開季成績低迷嘅曼聯，轉戰歐聯要踢爭氣波，周三凌晨作客馬德里體育會，雖然牌面上被睇低，不過「紅魔鬼」向來遇強愈強，拿手嘅反擊戰術最適合踢下風波，今場有力喺馬體會身上搶分，受讓寧捧讓球客勝（+1）。（Now 638周三凌晨3時直播）文:工廠仔

曼聯今季再戰歐聯，首場即旗開得勝4比0大破沙巴FC，不過今場先係真正考驗。曼聯上場聯賽被熱刺逼和1比1，開季8場只有2勝3和3負，領隊卡域克備受壓力。卡域克今季希望轉型以控球主導，不過以般奴費南迪斯、麥比奧莫等為進攻核心，踢法上明顯更適合穩守突擊，亦係球隊成績不穩原因。

曼聯一向最拿手踢快速反擊，下風波往往就係佢哋發揮最好嘅場合，上月對曼城佢哋表現出色，只係因為一次誤判而枉輸，而卡域克上任後，已有擊敗曼城、阿仙奴、利物浦同車路士嘅紀錄，印證曼聯遇強愈強嘅特質。隨住防守中場卡路士巴利巴復出，曼聯搶截能力大大提升，更加有利戰術發揮。

馬體會鬥英超兵4連敗
另邊廂，馬德里體育會喺歐聯首仗以1比2不敵利物浦，歐聯面對英超球隊更錄得4連敗；相反，曼聯對西甲球隊一向硬淨，近11次歐洲賽面對西甲球隊，一共錄得7勝3和1負佳績，今場造訪西班牙有望全身而退，讓球客勝（+1）抵玩。