東盟盃決賽，主辦國印尼同泰國爭逐冠軍寶座。印尼喺分組賽超級戲劇性咁出線，絕地狂攻之下展現出強大火力，一班「外援」令球隊攻擊力大增，今場對住東南亞嘅擂台躉泰國，駁火鬥攻機會極大，2.5球嘅入球大有保證！（Viu 96周一晚9時直播）文:工廠仔

印尼喺分組賽同馬來西亞爭首名鬥得激烈，最後一輪要搶得失球情況下，印尼喺補時階段連轟3球，以9比2狂數孟加拉，並且憑住呢場神奇大勝，喺同分兼同得失球差情況下，憑較多入波力壓馬來西亞晉級決賽。印尼亦展示出佢哋嘅進攻威力。

印尼近年進步神速，多得國家隊積極招攬有印尼血統嘅「外援」歸隊，上年入隊嘅羅馬尼喺荷蘭出世，今年入選嘅域卡利喺美國出生，上場獨取5球嘅高大中鋒米曹巴卡就喺澳洲出世，印尼攻擊線多咗呢班高質球員加入，當然夠料踢出更進取嘅足球。

兩軍交手例演入球騷
泰國實力強勁，分組賽輕鬆晉級，上場喺篤定出線之下留力決賽，先至1比2輸畀菲律賓。一班主力養精蓄銳，今場勢必同主隊進行駁火。兩隊近年對賽都非常激烈，過去6次交鋒，有5次總入球開3球或以上，2.5球大盤放心捧場。