歐國聯A1組榜首之戰，法國主場對比利時，雙方日前首循環交鋒，法國作客小勝1比0，兩軍短時間內再次碰頭，估計戰局變化唔大。況且法國由施丹接手執教後，仍然處於摸索同調整階段，講求四平八穩，今屆歐國聯3戰總入球全開2球或以下，不妨再追中位數3.5球入球細。(周二凌晨2時45分開賽）

法國擁有多位頂級進攻球員，但3場歐國聯合共僅入3球，表現令人失望，首仗對全組最弱嘅土耳其，即使有皇馬神鋒基利安麥巴比在陣，都只係贏1比0，「麥總」受傷缺陣之後，入波能力進一步受削，第2場作客比利時，要踢到88分鐘，先至由米高奧利斯入波險勝1比0。

比利時老將多減慢節奏
去到上仗，法國主場出擊，全靠死球戰術先至攻入意大利大門，但最終卻被逼和1比1。由此可見，施丹7月底接手帥位，仍然處於摸索階段，以穩陣行先，只求全取3分完成任務，唔會追求大勝。

至於比利時上仗大勝土耳其3比0，35歲中場奇雲迪布尼梅開二度，33歲前鋒盧卡古後備上陣亦建一功，雖然贏，但亦反映青黃不接問題嚴重，至今仍然要靠兩位接近退役嘅老將數胡。今次歐國聯賽程頻密，一個半星期連踢4輪，球員體力負荷沉重，尤其係對於高齡球員影響更大。比利時來到第4場，奇雲迪布尼、盧卡古能否保持水準，實屬疑問，屆時可能減慢比賽節奏，以免後勁不繼。加上雙方近4次交鋒有3次總入球開2球或以下，捧入球細最穩陣。