歐霸第2輪焦點戰，切爾達主場迎戰祖雲達斯。切爾達一向保守到暈，加上首輪落敗，今遇硬嘢隨時更龜縮，不過祖雲達斯客場例麻麻，唔慌多波入，2.5球細盤好路。

（Now 643周五凌晨3時直播）文:法達斯維

切爾達開咧後各項賽事9場僅得1勝5和3負，其中喺歐霸首輪落筆打三更，意外地以0比1輸畀奧摩尼亞，呢支西甲中游分子攻力疲弱，單計聯賽8輪共入8粒，但其中5球係來自大勝桑坦德之役，即係話其餘7輪入得3粒咁大把。幸好佢哋守得兩嘴，因此近7場有6次開2球或以下，明顯係守強攻弱。

另邊廂，意甲勁旅祖雲達斯開咧後表現尚可，各項賽事7場獲4勝2和1負，但除咗歐霸首輪豪贈奈梅亨5蛋外，其餘賽事佢哋頂盡入2球，新兵前鋒禾達美迪加盟後僅入1球，仍未融入，進攻核心耶迪斯仲養緊傷，攻力打折扣，單靠高路梅安尼確係孤掌難鳴。何況「老婦人」客場表現麻麻，今季各項賽事3場作客，勝和負各1，包括日前聯賽造訪卡利亞里只能逼和1比1，想破切爾達嘅鐵桶陣都唔易，寧捧入球細。