歐國聯A4組第3輪，丹麥主場對葡萄牙。兩屆冠軍葡萄牙踢歐國聯向來認真，今屆賽事亦場場搏盡，目前兩戰兩勝排榜首，在同組各隊中實力明顯高一籌，隊長Ｃ朗休息1場後復出，肯定更搶韁，而且葡軍近5次對丹麥錄得4勝1負，往績佔上風，客勝放心捧。（周五凌晨2時45分開賽）文:邪神

葡軍踢歐國聯交足貨
歐國聯今屆係第5屆，賽事原意係畀各隊練兵之用，但葡萄牙就異常搏命，先後喺首屆同上屆賽事封王，新帥佐治捷西斯剛接掌帥印亦秉承傳統，今屆開局連贏兩場，其中上仗收起兩大王牌Ｃ朗同般奴費南迪斯之下，作客照贏鋒霸艾寧夏蘭特壓陣嘅挪威2比1，球員交足貨，實行「盃仔」都唔放過。

上場亦係41歲嘅Ｃ朗18年來首次坐足全場冷板，不過佐治捷西斯上場賽後已經「補飛」，揚言會派Ｃ朗落場鬥丹麥，「大哥」抖咗1場叉足電，谷谷埋埋，今場隨時大爆發取得入球。

丹麥缺席今夏世盃賽事，喺歐國聯重新出發，至今錄得1勝1負，3位攻擊球員海倫、伊薩辛同丹斯加特均已開齋，不過曼聯翼鋒柏德列多古受傷退隊，左路進攻必受影響，何況佢哋近年對葡軍輸多贏少，今仗輸波不足為奇，今場「任何時間入球球員」，一於揀埋「基斯坦奴朗拿度」。