蘇格蘭喺C組首戰鬥海地，對佢哋嚟講絕對好消息，始終同組巴西及摩洛哥實力高咗一截，「風笛國」先對同組最弱，必定以全取3分兼盡量贏多幾粒，作為爭「最佳第3名」籌碼，客勝當然唔錯，但入球大賠率更吸引，推介大家玩2.5球嘅大盤。（Now 618及616周日早上9時直播）文:渡邊年

海地大賽經驗近乎零
中北美洲代表海地，自1974年後再入世盃決賽周，好大程度上受惠於美、墨、加三國做主辦國，騰空咗啲位出嚟畀啲二線球隊爭，佢哋係48支參賽球隊入面，世界排名第2低國家，僅僅叻過新西蘭。海地嚴重缺乏大賽經驗，而且世盃外兩圈踢10場都失13球，防守唔太穩陣，對住實力更強嘅蘇格蘭，肯定頂唔住。

蘇格蘭難得遇上魚腩海地，必定趁機盡數，除咗要全取3分，最重要係「儲定彈藥」，預料之後對巴西及摩洛哥都好大機會輸波，當最終手執3分要同隔籬組爭最佳第3嘅時候，得失球隨時成為出線淘汰賽關鍵。

「風笛國」近8仗獲5勝3負之餘，有6次開3球或以上，包括近2仗全勝共入8球，麥湯米尼、約翰麥甘尼、查阿當斯等輪流發威，誓狂攻海地博大捷，捧入球大更穩陣。