世盃D組首輪重頭戲，東道主美國迎戰巴拉圭。美國踢法進取，加上擁有主場之利，預計戰況可觀，美國務求喺上半場先聲奪人，令球迷大飽眼福；不過巴拉圭亦唔會坐以待斃，球隊擅長快速攻守轉換，雙方好容易甫開賽就駁火，首選1.5球嘅半場大。

（ViuTV 99台、Now 618及616周六早上9時直播)文:邪神

美國目前處於「黃金一代」高峰期，外流歐洲球員超過10人，而且全部都係當打之年，骨幹成員包括基斯甸普列錫、韋斯頓麥堅尼、添莫菲韋亞及基奧雲尼雷拿等，配合體力化踢法，以及名帥普捷天奴加強戰術紀律，整體實力「升呢」，球隊繼上屆打入16強後，今屆主場更加唔衰得，有望更進一步走得更遠。

花旗兵對賽佔優必搶攻
「花旗兵」踢法非常進取，主場第一擊肯定以贏波為目標，事實上佢哋近3次對巴拉圭全勝，心理上早已建立優勢，加上近7仗6次半場開2球或以上，預計今場一開波就搶攻。

至於巴拉圭，闊別16年再戰決賽周，「巴拉圭乳神」娜莉莎列姬美亦強勢回歸，擔任隨軍記者（見另文），球員心情興奮打高一皮波，再睇佢哋幾位主力如米基爾阿米朗、白賴仁奧積達同馬迪亞斯加拉薩都喺美職落班，對美國環境唔陌生，而且對於美國隊踢法亦有一定了解，大賽氣氛促使下，踢法同樣進取嘅兩隊，將會傾力鬥攻盡快入波，半場大好快夠數。